للكبار فقط

طبعا لازم أهنئ كل عضو دخل هنا بس اعرفوا انما الأعمال بالنيات

عاوزة الأعضاء اللي أكبر من ثانوي يعني لو في حد مخلص يبقى كويس كمان ولازم طبعا المسيو يكون منهم يقولنا نصايح نبدأ بيها العام الدراسي وتبقى نفسنا مفتوحة للمذاكرة لأني كل ما بشوف الكتب بحس اني مخنوقة

الحمد لله انا مخلص جداً .. لكن الله أعلم ان كنت كويس و لا لأ
بس عموماً أنا خبرة فى ثانوى و انتو عارفين
و عشان كدا ... تعالوو لما أقولكم

أولاً .. عشان تستفيد بالدرس اللى أخدته .. لازم تذاكرو فى نفس اليوم اللى أخدته فيه عشان تبقا فاكر كلام الأستاذ و يمكن فاكر صوته كمان

ثانياً .. بعد ما تخلص وحدة أو فصل معين ... لازم تعمل عليه مراجعة حتى و ان كانت سريعة عشان تلم الفصل كله فى مخك و ما يبقاش معلومات متفرقة و متشتتة

ثالثاً .. تهتم بانك تفهم الموضوع .. لأنك لو فهمته مش هتبقا خايف من حاجة .. بالنسبالى انا .. اهم حاجة ابقا مذاكر و فاهم .. حتى لو مش حالل أسئلة بفتكر الإجابة من اللى فاهمه و الحمد لله على النعمة دى

رابعاً .. أهم حاجة برضو المراجعة .. أكتر من مرة ... عشان الحاجة تثبت .. بس حاولو من البداية تقرو بتركيز .. عشان المراجعة تبقا ليها فايدة

خامساً.. نصيحة الخبرة بقا ..لما تذاكرو حاجة .. ذاكروها كأنكم بتذاكروها للامتحان .. بمعنى انها لازم تتفهم كويس عشان لازم نفتكرها بتفاصيلها بعد كدا ان شاء الله .. خصوصاً لو كانت حاجة من الحاجات المعروفة انها بتيحى فى الامتحانات كتير

سادساً .. إدو كل مادة حقها .. ما تخليش حد يقولك :"يا عم الانجليزى عليه 25 انما الكيميا عليها 50 سيبك من الإنجليزى دلوقتى" ...لالالالالالا .. الدرجة اللى تنقص فى الانجليزى زيها زى الدرجة اللى تنقص فى الكيميا ... فاهتمو بكل المواد

سابعاً .. مهم انك تكون مخلص المنهج بدرى و تراجع عشان تبدأ تحل امتحانات بدرى .. لأن الامتحانات بتيجى فيها أسئلة متكررة و بتبقا الأسئلة فيها عن أهم المعلومات اللى فى المنهج أو اكترها فايدة فى الحياة العملية

ثامناً ... ما تخافش من حاجة و سيبها على الله .. بس زى ما قولتلك تبقا عامل اللى عليك و سيبها على الله .. عشان تبق متوكل .. مش متواكل

تاسعاً ... مهم جداً وقت الامتحان نفسه .. يعنى ممكن تبقا مذاكر كويس .. بس الوقت يسرقك فى اللجنة لا قدر الله .. حاول تحل السهل بسررررعة عشان تلاقى وقت تفكر فيه فى الصعب

عاشراً .. مش نصيحة .. دى حاجات أساسيات لازم تبقا فى قلبك .. بس حبيت أذكركم بيها ... تقوى الله و رضا الوالدين .. و من يتقى الله يجعل له مخرجاً و يرزقه من حيث لا يحتسب .. و أستاذى "المستر عمر" الله يديله الصحة قاللى : " ابوك و أمك كدا كدا بيدعولك .. بس لو بوست على راسهم قبل ما تطلع هيدعوووولك من كل قلبهم " .. و فعلاً جربت الوصفة أكتر من مرة و جابت نتيجة

يا بنت بدر ليه تتخنقى من الكتب ... طب تعالى لما أقولك :
عشان تبقا نفسك مفتووحة ع المذاكرة و مش مخنووقة
فكرى فى إحساسك بعد النجاح .. بعد ما توصلى لهدفك .. و ربنا يستجيبلك و يقولك اتفضلى صيدلة ... بصى على نفسك كدا
و الكل بيقولك الف مبروك عليكى النجاح و الف مبروك عليكى صيدلة ربنا يكرمك فيها
بصى كدا على ماما و على بابا ... بصى و شووفى الفرحة فى عينيهم .. طب و اخوااتك .. هااااا مش عينيهم بتلمع من الفرحة برضوووو ؟؟
و انتى بقا بصى ع المراية و انتى معدية من قدامها كدا .. اوقفى و بصى .. ها .. شايفة عينيكة منورة ازاى .. عمرك كنتى فرحانة كدا .. شايفة ؟؟
بصى فى قلبك تلاقى نفسك فرحااانة و فخوورة بنفسك و و فرحانة ان ربنا كرمك و انك حققتى أملك ... و فرّحتى أهلك و بنيتى مستقبلك

فكرى فى كل دا .. و رووحى بصى ع الكتب .. هتلاقى نفسك مستمتعة جداً و انتى فى طريقك لتحقيق هدفك .. اللى لاااااااازم توصليله ان شاء الله

على فكرة انا كمان هأفرحلك كتييير بظهر الغيب .. و ربنا يعلم

و نفس النصيحة للكل .. فكرو فى النجااااااح اللى هتوصلوله بالعمل دا عشان تحبوووه .. و ربنا يكتبلكم النجاح جميعاً و يوصلكم لأهدافكم ..


أظن انى كنت مخلص جداً فى النصايح دى
اتمنى الكل يستفاد بيها




و على فكرة :
انا كنت ناوى أعمل موضوع أسميه" رسالة الى طلاب الثانوية العامة" .. بس بما أنك سبقتينى يا بنت بدر .. فكتبتها هنا ..ربنا يجعلك سباقة فى الخير دايماً ..و يوفقكم ان شاء الله

أما عن المسيو فهو مشغول جداً بالجمعية الخيرية .. دعواتكم معاه ربنا يوفقه للخير ان شاء الله